راولپنڈی ۔21جنوری(اے پی پی) چیف جسٹس آف پاکستان عمرعطا بندیال اتے جسٹس اطہر من اللہ سینٹرل جیل راولپنڈی دا دورہ کیتے، ایں موقع تے سینٹرل جیل دے چاک و چوبند دستے انہاں کوں گارڈ آف آنر پیش کیتا، ڈسٹرکٹ اینڈ سیشن جج اسلام آباد ویسٹ طاہر محمود خان، ڈسٹرکٹ اینڈ سیشن جج راولپنڈی ایسٹ عطا ربانی، سپیشل ہوم سیکرٹری فضل الرحمان، رجسٹرار سپریم کورٹ آف پاکستان عشرت حسین، انسپکٹر جنرل جیل خانہ جات ملک مبشر احمد اعوان، ڈپٹی انسپکٹر جنرل سعید اللہ گوندل، سپرنٹینڈنٹ جیل اسد جاوید وڑائچ، سیکرٹری لاء کمیشن رفعت انعام بٹ، چیف کمشنر اسلام آباد کیپٹن (ر) محمد عثمان، سی پی او شہزاد بخاری، وائس چانسلر میڈیکل یونیورسٹی پروفیسر ڈاکٹر محمد عمر، چیئر پرسن ویمن ایڈ ٹرسٹ شاہینہ خان اتے ٻئے افسران ایں موقع تے موجود ہن ، انسپکٹر جنرل ملک مبشر اعوان معزز جج صاحبان کوں پنجاب بھر دیاں جیلاں تے بالخصوص سینٹرل جیل راولپنڈی اچ اسیران سانڳے کیتے گئے اقدامات اتے سہولتاں ݙیوݨ دے حوالے نال تفصیلی بریفننگ ݙتی، جج صاحبان جیل ھذا دے مختلف حصیں تریمت وارڈ، نو عمر وارڈ، جیل پی سی او اتے حوالاتی وقیدی بیرکاں دا معائنہ کیتا، انہاں اسیران دے رہݨ سہݨ، خوراک دیاں سہولتاں ، موسمی ضرورتاں ، طبی سہولتاں، کھیݙ وتفریح دے انتظامات، مفت قانونی امداد، تعلیمی سرگرمیاں اتے ووکیشنل ٹریننگ دے پروگرام اتے اسیران دے کیسز اتے اپیلاں بارے معلومات ڳھدیاں تے موقع تے موجود عدلیہ دے حکام اتے جیل انتظامیہ کوں اسیران کوں سہولتاݨ ݙیوݨ دے تسلسل تے مزید بہتری دے احکامات جاری کیتے۔ انہاں تریمتاں وارڈ اچ نکے ٻالاں دی ݙیکھ بھال اتے تعلیم و تربیت دے انتظامات دا خصوصی جائزہ ڳھدا تے ٻالاں اچ تحفے ونڈیے ، انہاں جیل دی نو عمر وارڈ اچ نکے اسیران دے فنی تعلیم دے مرکز دا جائزہ ڳھدا انہاں اچ گرم کپڑے تے ضروری چیزاں تے مشتمل گفٹ بیگ ونڈیے ، جج صاحبان چیئر پرسن نیشنل کمیشن فار ہیومن رائٹس رابعہ جویری آ غا دی انسانی حقوق دے حوالے نال خدمات دی تعریف کیتی تے جیلاں اچ مقید اسیران کوں انسانی حقوق دی آ گاہی دے اقدامات اتے جیل سٹاف دی ٹریننگ تے زورݙتا، انہاں چیئر پرسن ویمن ایڈ ٹرسٹ شاہینہ خان اتے پروفیسر ڈاکٹر محمد عمر دی ٹیم دی جیل اسیران کیتے خدمات دی تعریف کیتی، ڈسٹرکٹ اینڈ سیشن جج صاحبان ڈسٹرکٹ اسلام آباد توں متعلقہ معمولی نوعیت دے جرائم اچ ملوث 11 اسیران دی رہائی دے احکامات جاری کیتے جنہاں کوں جیل توں رہا کرݙتا ڳئے ۔
