مظفرگڑھ۔ 21 نومبر (اے پی پی) ستویں تھل جیپ ریلی، ریسر میر نادر مگسی تریجھی واری چیمپئن ٻݨ ڳے۔ 17 نومبر توں 20 نومبر تئیں چار ݙینھ دی ستویں تھل جیپ ریلی سنسنی خیز مقابلے دےبعد مُک ڳی۔ پنجاب ٹورازم ڈویلپمنٹ کارپوریشن ضلعی انتظامیہ دے تعاون نال تھل جیپ ریلی سال 2006 توں ضلع مظفرگڑھ دے ریگزاراں اچ شروع کیتی اتے ویلھے نال ایندی مقبولیت ودھ ڳی اتے ہر سال ریسرز اتے شائقین دی تعداد ودھدی ڳی۔ ایں سال جیپ ریلی اچ پنج تریمتیں ریسرز سودھے 115 ریسر حصہ ڳھدا جئیں اچ ٻاہرلے ملک توں آئے ہوئے ریسرز وی شامل ہن۔ گزریل سال 2021 اچ چھینویں تھل جیپ ریلی دے فاتح زین محمود ہن اتے ایں سال 2022 اچ ستویں تھل جیپ ریلی پاکستان دے معروف ریسر میر نادر مگسی تریجھی واری آپݨے ناں کیتی۔
