اسلام آباد۔31اگست (اے پی پی):وفاقی وز یر ریلوے خواجہ سعد رفیق تے وزیر اعظم دے مشیر قمر زمان کائرہ آکھیے جو سیلاب متاثرین دی بحالی کیتے ساریں کوں رل تے انہاں دی مدد کرݨی چاہیدی اے ،اوکھے ویلھے ساریاں صوبائی حکومتاں کوں رلے گھن تے ٹرسوں تے کہیں متاثرہ بندے کوں کلھا نہ چھوڑیسوں،اے ویلھا سیاسی لڑائی دا کائنی عوام دی مدد کرݨ دا اے ، ترکیہ توں 4 ریل ڳاݙیاں امدادی سامان گھن آسن ، آئی ایم ایف دی امداد ایجھا تالا اے جیڑھا جو کھلسی تاں ٻئے ادارے وی امداد ݙیسن ،سڑکاں ترٹݨ دی وجہ توں امدادی سامان پڄاوݨ اچ اوکھ تھیندی پئی اے ، پاک فوج ہر اوکھے ویلھے آپݨے ہم وطناں دا ساتھ ݙتے ، ساری حکومتی مشینری سیلاب متاثرین دی مدد کیتے میدان وچ اے ، سیلاب تے مینھ پاروں ضیان دا تخمینہ لاتا ویندا پئے ، پاکستان کوں ضیان توں بچاوݨ کیتے اساں آپݨی سیاست کوں داؤ تے لاتے ، اے ڳالھ ٻدھ کوں وفاقی وزیر ریلوے خواجہ سعد رفیق تے وزیراعظم دے مشیر امور کشمیر و گلگت بلتستان قمرزمان کائرہ پریس کانفرنس توں آپݨے خطاب اچ آکھی اے۔ وفاقی وزیر ریلوے خواجہ سعد رفیق آکھیے جو اڄوکے ساوݨ دے مینھ اچ تباہ کن سیلاب 2010 دا ریکارڈ بھن ݙتے ، بلوچستان تے سندھ دے علاقے زیادہ متاثرتھئن ،خیبر پختونخوا اتے پنجاب دے حالات وی چنڳے کائنی،پاکستان معاشی بحران دا شکار اے،ایجھے موقع تے سیلاب معیشت دی چیل بھن ݙتی اے ،حکومت پاکستان، ریاستی ادارے سارے ریسکیو آپریشن اچ مصروف ہن ،بحالی دا مرحلہ ایں توں اوکھا ہوسی ۔انہاں آکھیے جو سیلاب پاروں فصلاں تے انفراسٹرکچر کوں ٻہوں ضیان تھئے اتے ایں وجہ توں سبزی دیاں قیمتاں ودھ ڳئن ،قوم دی وݙی تعداد وی متاثرین سیلاب دی مدد کیتے کم کریندی پئی اے ݙوجھے پاسے عالمی برداری ساݙی مدد کریندی پئی اے ۔ وفاقی وزیرآکھیے جو موجودہ صورتحال اچ سیاست تے ڳالھ نہ کرݨ چاہندے ہاسے ،سارے ڄاݨدن جو اساں آئی ایم ایف کوں خیرآباد کرڳئے ہاسے ،ماضی دی حکومت آیی ایم ایف دا پروگرام ڳھدا لیکن اصلاحات نہ کیتی،ماضی اچ سابقہ حکومت ملک کوں معاشی طورتے کمزورکیتا لیکن موجودہ حکومت پاکستان کوں دیوالیہ تھیوݨ توں بچا ڳھدے ۔سعد رفیق وزیراعظم ہائوس اچ فلڈ کانفرنس کیتی جیں اچ فوجی قیادت وی موجود ہئی ، بلوچستان اتے سندھ دے وزرائے اعلیٰ وی شریک تھئن لیکن ملک کیتے پنچاب اتے خیبرپختونخوادے وزرائے اعلیٰ نی آئے،انہاں آکھیے جیڑھی وی مدد ملدی پئی اے او بحالی کیتے گھٹ اے ،ریلوے دا وی سیلاب اچ ضیان تھئے ،کوئٹہ اتے سنی دے رستے اچ جیڑھا پل اے ترٹ ڳئے ۔ ھک سوال دا جواب ݙیندے ہوئیں انہاں آکھیے جو سیلاب متاثرین دی مدد کیتے ساریں کوں ھک چھت تلے بہݨا چاہیدے جیڑھے لڑائی دی سیاست کریندے پئن انہاں کوں کرݨ ݙیو لیکن ہݨ لڑائی دا ویلھا کائنی بلکہ جیڑھے لوک متاثرتھئن انہاں دی بحالی و خدمت دا اے ۔
