اسلام آباد۔23اگست (اے پی پی):چیئرمین سینیٹ صادق سنجرانی کوں تحفے اچ ݙتے ڳئے فن پارہ کوں پارلیمنٹ ہاؤس دے گیٹ نمبر ون دی زینت بݨا ݙتا ڳئے ۔سینیٹ سیکرٹریٹ موجب فن پارہ اچ کلمہ طیبہ کوں دائرے دی شکل اچ خط کوفی اچ لکھیا ڳئے تے ول اینکوں فن پارے دی شکل اچ تخلیق کیتا ڳئے ۔ کلمہ طیبہ ایں فن پارے اچ چار واری لکھیا ڳئے ، ایں فن پارے اچ لائن اندر توں ٻہر دے پاسے شعاعویں وانڳوں تے ایں فن پارے دا گول ہووݨ ساݙی زمین کوں ظاہر کریندے ، اے فن پارہ ایں ڳالھ دی نشاندہی کریندے جو اللہ اتے اللہ دے رسول حضرت محمد ﷺ دا پیغام (اسلام)پوری دنیا اچ کھنڈ ڳئے تے مزید کھنڈدا پئے ۔اے فن پارہ فائبر گلاس نال بݨایا ڳئے تے ایندے وچ پیتل دے ٹکڑے لاتے ڳئن ،پیتل دا رنگ سونے وانڳوں ہوندے جیڑھا جو ایں فن پارے اچ علم دی دولت کوں ظاہر کریندے ۔ ایں فن پارے تے کیتا ڳیا چٹا رنگ ڈیکو پینٹ اے جیڑھا جو ہر موسم دی سختی برداشت کرسڳدے ۔ایں فن پارے دا سائز4 × 4 اے۔ ایں فن پارے کوں بݨݨ اچ 8 مہینے لڳئن ۔ ایں فن پارہ اچ مقامی خطاط ناصر جاوید کلمہ طیبہ کوں سوہݨے انداز اچ تخلیق کیتے۔ناصر جاوید اے فن پارہ چیئرمین سینیٹ محمد صادق سنجرانی کوں بطور تحفہ ݙتا جیں کوں چیئرمین سینیٹ دی ہدایت تے پارلیمنٹ ہاؤس دی بلڈنگ دے گیٹ نمبر ون تے لاݙتا ڳئے ۔ لاتا ڳیا فن پارہ لوکاں دی توجہ گھندا پئے۔
