اسلام آباد۔8جولائی(اے پی پی) وفاقی وزیرخزانہ ومحصولات سینیٹر محمد اورنگزیب آکھیے جو حکومت ٹیکس تے توانائی دے شعبیں اچ اصلاحات اتے ریاستی ملکیتی اداریں دی نویں سروں تنظیم کریندی پئی اے۔ برآمدات تے مبنی پائیدارنمو تےاستحکام سانڳے اقدامات دا سلسلہ جاری اے۔ اے ڳالھ انہاں بانی اتے چیئرمین ڈیلیوری ایسوسی ایٹس سر مائیکل باربر کوں ملاقات اچ آکھی اے ۔ ایں موقع تے برٹش ہائی کمیشن دی ڈویلپمنٹ ڈائریکٹرجوموئیر، سینئرگورننس ایڈوائزر میٹ کلینسی، گورننس ایڈوائرزنویدعزیز،سینئراکنامک ایڈوائزرلوئی دانے اتے وزارت خزانہ دے افسر موجود ہن۔سر مائیکل باربر نویں مالی سال دے وفاقی بجٹ تے حکومت پاکستان دی طرفوں نافذ کیتے ڳئے ٹیکسیشن متعلق ڈھانچہ جاتی اصلاحات دی تعریف کیتی ۔ انہاں پاکستان دے مقامی اقتصادی منصوبے دے حوالے نال ترجیحی شعبیں تے ڳالھ مہاڑ کیتی ۔ انہاں تعاون دیاں کوششاں اڳوں ودھاوݨ تے پاکستان دی حمایت جاری رکھݨ دے عزم دا اعادہ کیتے ۔ وزیر خزانہ سر مائیکل دا شکریہ ادا کیتے تے حکومت برطانیہ دی طرفوں پاکستان دی حمایت دی تعریف کیتی انہاں کلیدی ترجیحی شعبیں دا خاکہ پیش کیتے ݙسائے جو حکومت ٹیکس اتے توانائی دے شعبیں اچ اصلاحات تے ریاستی ملکیتی اداریں دی نویں سروں تنظیم کریندی پئی اے ۔ آئی ایم ایف پروگرام دے فریم ورک دے اندر ڈھانچہ جاتی اصلاحات دی اہمیت تے زور ݙیندے وفاقی وزیر برآمدات ودھاوݨ ، براہ راست غیر ملکی سرمایہ کاری گھن آوݨ تے نجکاری دیاں کوششاں تے ڳالھ کیتی، انہاں آکھیے شفافیت یقینی بݨاوݨ، ٹیکس دی بنیاد ودھاوݨ، برآمدات تے مبنی نمو اتے فیڈرل بورڈ آف ریونیو(ایف بی آر) دی ڈیجیٹلائزیشن حکومت دی پہلی ترجیح اچ شامل اے۔ فریقین تعاون ودھاوݨ تے سانجھے سٹریٹجک اہداف تے پائیدار اقتصادی ترقی تے توجہ ݙیوݨ نال اتفاق کیتے
