اسلام آباد۔12دسمبر (اے پی پی) نگران وفاقی وزیر توانائی محمد علی آکھیا جو ملک دے لوڑھ دے مطابق کھاد درآمد کر ڳھدی ڳئی اے، یوریا کھاد دی پیداوار ودھائی ویسی، ایں سال سردیاں اچ کھاد دا کوئی پلانٹ بند کائنا کیتا ویسی۔ منگل کوں وفاقی وزیر داخلہ سرفرازبگٹی اتے وفاقی وزیراطلاعات ونشریات دے رلے پریس کانفرنس توں خطاب کریندیں ہوئیں انہاں آکھیا جو ماضی اچ اساکوں کجھ کھاد پلانٹس سردیاں اچ گیس دی ڳھٹکی پاروں بند کرݨے پئے ہن۔ ایں سال اساں فیصلہ کیتے جو کوئی وی پلانٹ بند کائنا کیتا ویسی اتے پوری سردیاں اچ پوری صلاحیت نال پلانٹس چلائے ویسن۔ فاطمہ فرٹیلائزر اتے ایگری ٹیک کوں ماضی اچ ݙو ترائے مہینے کیتے بند کیتا ویندا ہئی ہݨ انہاں کوں بند کائنا کیتا ویسی۔ سارے پلانٹ چلدے پئن اتے دسمبر جنوری، فروری اتے مارچ اچ سارے پلانٹس چلسن۔ یوریا کھاد لوڑھ دے مطابق درآمد کیتی ویندی پئی اے۔ سارے کھاد کمپنیاں نال رابطے اچ ہیسے، مڈل مین صورتحال توں فیدہ چیندے پئن۔ ایل این جی منڳواوݨ پاروں کھاد دے کارخانیاں کوں گیس سپلائی کیتی ویندی پئی اے۔ ملک اچ گیس دی سپلائی اٹھ توں نو فیصد ڳھٹ تھئی اے اتے اینکوں پورا کرݨ کیتے ایل این جی منڳوائی ویندی اے۔ ملک اچ گیس دے ذخائر موجود ہن۔ اساں بئے 100 ایم ایم سی ایف ڈی گیس سسٹم اچ ڳھن آوݨ دی کوشش کریندے پئیوں۔ پالیسیاں اچ تبدیلی تے وی کم کریندے پئیوں۔
