اسلام آباد۔11اگست (اے پی پی):وفاقی وزیر اطلاعات و نشریات مریم اورنگزیب آکھیے جو عمران خان شرمناک تے زہریلا کھیݙ کھیݙ تے اپݨی فارن فنڈنگ توں نظر ہٹواوݨ دی کوشش کریندے پئن ، شہداء دے خلاف شرمناک مہم چلاوݨ توں توشہ خانہ تے فارن فنڈنگ توں توجہ نی ہٹوائی ونڄ سڳدی ، فارن فنڈنگ ملک دا دفاع کمزور کرݨ کیتے استعمال تھئی، فارن ایجنٹ عمران خان پنج سال کوڑے حلف نامے جمع کروائے، ایف آئی اے فارن فنڈنگ دے استعمال دی تحقیقات کریندی پئی اے ۔ خمیس کوں اتھاں پریس کانفرنس توں خطاب کریندے ہوئیں وفاقی وزیر اطلاعات آکھیے جو چار سال ایں ملک تے نالائق اتے نااہل وزیراعظم مسلط رہیا جیں ملک لٹیا تے عوام کوں بے روزگار کیتا۔ انہاں آکھیے جو عمران خان فارن ایجنٹ اتے فارن ایڈڈ پارٹی دا چیئرمین اے جیں فارن فنڈنگ وصول کیتی، 2008ء توں 2013ء تئیں ڳھدی ڳئی ممنوعہ فنڈنگ متعلق الیکشن کمیشن دے فیصلے اچ پی ٹی آئی فارن ایڈڈ پارٹی ڈیکلیئر تھی چکی اے ، الیکشن کمیشن دے فیصلہ موجب عمران خان پنج سال تئیں نقلی بیان حلفی جمع کروائے، عمران خان 351 فارن کمپنیاں اتے 34 غیر ملکیاں توں فنڈنگ وصول کیتی، پاکستان اچ کمپنیاں توں وی ممنوعہ فنڈنگ وصول کیتی، انہاں اے ساری فنڈنگ الیکشن کمیشن اچ ڈیکلیئر نی کیتی تے الیکشن کمیشن اچ نلقی تے کوڑے بیان حلفی جمع کرویندے رہیے ۔ انہاں آکھیے جو اے چور تے فارن ایجنٹ اٹھ سال دے بعد وٹھیے ڳئن اے ایجھے فارن ایجنٹ ہن جنہاں ھک سیاسی جماعت دا سہارا ڳھدا تے ایں سیاسی جماعت دی ساکھ کوں وی ضیان پڄائے ، انہاں آکھیے پی ٹی آئی دے کارکن عمران خان توں سوال کرن جو انہاں ایں پارٹی کوں کیوں فارن ایڈڈ پارٹی ڈیکلیئر کروائے۔ انہاں آکھیے جو ممنوعہ فنڈنگ دی تحقیقات 2008ء توں 2013ء تئیں دیاں ہن ، 2013ء توں بعد دی تحقیقات تھیوݨ حالی باقی ہن جیڑھا جو فارن فنڈنگ ایں عرصے اچ آئی او کتھاں ڳئی ایں تے ایف آئی اے اچ تحقیقات جاری ہن۔ انہاں آکھیے جو فارن ایجنٹ عمران خان ایں ملک دے خلاف سازش کیتی ، اوشرمناک حرکتاں تے ملک دے خلاف زہریلا کھیݙ کھیݙ تے آپݨی فارن فنڈنگ اتے الیکشن کمیشن دے فیصلے توں نظر ہٹواوݨ چاہندن ۔ انہاں آکھیے عمران خان ہیلی کاپٹر حادثہ دے شہداء دے خلاف اپݨے ٹرولرز دے ذریعے سوشل میڈیا تے مہم چلوائی، انہاں کوں جݙاں وی جواب ݙیوݨا ہوندے او ایں طرح دیاں حرکتاں کریندن ۔ انہاں آکھیے جو عمران خان دے چیف آف اسٹاف اے آر وائی تے ایں ٹرانسکرپٹ کوں پڑھیا جیڑھا عمران خان دا لکھیا ہویا ہئی ، ایں ٹرانسکرپٹ اچ ریڈ لائن کراس تھئن ، انہاں دا افواج پاکستان اچ بغاوت کوں اکساوݨ دا منصوبہ ہئی شہباز گل آکھیے لانس نائیک توں گھن تے بریگیڈیئر تئیں دا تعلق پاکستان تحریک انصاف توں اے ، انہاں کوں سیاست نال جوڑیا ڳیا تے انہاں ہائی کمان دے احکامات تے بغاوت دی کال ݙتی، 15 منٹ تئیں کہیں وقفے دے بغیر اے بیپر اے آر وائے تے چلدا رہیا ۔
