لاہور۔12مئی(اے پی پی) نگران وزیراعلی پنجاب محسن نقوی دی صدارت اچ وزیراعلی آفس اچ صوبے اچ قانون دی عملداری کوں یقینی بݨاوݨ کیتے جائزہ اجلاس منعقد تھیا ۔ترجمان موجب نگران وزیراعلی محسن نقوی صوبے وچ امن و امان دی صورت حال کوں قابو رکھݨ کیتے سارے قانونی اقدامات چاوݨ دا حکم ݙیندے ہوئیں آکھیے جو ہرحملہ آور دی شناخت کر تے قانون دے مطابق قرار واقعی سزا ݙیوائی ویسی ۔ انہاں آکھیے سرکاری املاک دی بھن تروڑ ساڑو گھیرا کرو نال دہشت گردی دا بد ترین مظاہرہ کیتا ڳئے۔ کور کمانڈر ہائوس سودھے سرکاری املاک تے حملہ کرݨ آلیں کوں قانون دے مطابق کیفرکردار تئیں پڄایا ویسی ۔ انہاں ہدایت کیتی جو محکمہ پراسیکیوشن دہشت گردی دے انہاں واقعات اچ ملوث عناصر دے خلاف پراسیکیوشن دے عمل کوں تکھی رفتارنال اڳوں ودھاوے تے شرپسندوں و حملہ آوراں دی شناخت داعمل وختی مکمل کیتا ونڄے ، انہاں آکھیے صوبے اچ قانون دی حکمرانی تے کوئی سمجھوتہ نہ تھیسی ۔
