مظفر آباد۔14دسمبر (اے پی پی) نگران وزیراعظم انوارالحق کاکڑ ݙو ݙینھ دے دورے تے مظفرآباد پڄ ڳئے۔ وزیراعظم دی مظفر آباد آمد تے آزاد کشمیر دے وزیراعظم چوہدری انوارالحق ہیلی پیڈ تے انہاں دا استقبال کیتا۔ نگران وزیراعظم شہیداں دی یادگار تے ڳئے جتھ انہاں جموں تے کشمیر دی آزادی دی تحریک اچ جاناں دا نذرانہ ݙیوݨ آلے شہیداں کوں خراج عقیدت پیش کیتا۔ وزیراعظم شہیداں دی یادگار تے حاضری ݙتی، پھلاں دی چادر چڑھائی اتے فاتحہ خوانی کیتی۔ بعد اچ وزیراعظم قانون ساز اسمبلی پڄیے جتھ انہاں کوں آزاد کشمیر پولیس دے چاق و چوبند دستے ولوں گارڈ آف آنر ݙتا ڳئیا۔
