اسلام آباد۔18نومبر (اے پی پی) صدر مملکت ڈاکٹر عارف علوی آکھیا جو تریمتیں کوں معاشی اتے مالی طور بااختیار ٻݨاوݨ کیتے ٻئے اقدمات کرݨ دی ٻہوں لوڑھ اے۔ پاکستان دی ترقی کیتے تریمتیں دی آبادی کوں فعال معاشی دھارے اچ رلاوݨ ضروری اے۔ اے ڳالھیں انہاں جمعے کوں ویمن بزنس نیٹ ورک دے وفد نال ملاقات کریندیں ہوئیں آکھی۔ صدرمملکت تریمتیں دی خودمختاری بارے اقدامات تے ہک جامع آگاہی مہم دی لوڑھ تے زور ݙتا۔ انہاں تریمتیں تے زور ݙتا جو او حکومت ولوں کیتے ڳے اقدامات توں فائدہ چاون۔ انہاں آکھیا جو تریمتیں کیتے کئی مخصوس پروگرام شروع کیتے ڳن، تریمتیں بینک برانچاں اچ ونڄے بغیر ہݨ آن لائن بینک اکاؤنٹ کھلوا سڳدن، تریمتیں دے ملکیتی حقوق بارے قوانین کوں وراثت ݙیوݨ لازمی قرار ݙے ݙتا ڳے۔ انہاں آکھیا جو بے نظیر انکم سپورٹ اتے احساس پروگرام تریمتیں دا ڈیٹا کٹھا کرݨ، وظیفے ݙیوݨ، انہاں دے بینک اکاؤنٹس کھولݨ اچ مدد، ڈیجیٹل ، ایس ایم ایس اتے ٻئی خدمات نال ڈیجیٹل کمیونیکیشن اچ اہم کردار ادا کریندا پے۔ انہاں آکھای جو تریمتیں پارلیمنٹرینز، چیمبرز آف کامرس، این جی اوز اتے ایڈووکیسی گروپس کوں چاہدیے جو او تلویں سطح تے تریمتیں تئیں پجݨ کیتے ہک حکمت عملی ٻݨاوݨ کیتے نال تھیون اتے انہاں کوں بااختیار ٻݨاوݨ کیتے معلومات اتے تعلیم ݙیون۔
