اسلام آباد۔3نومبر(اے پی پی)وزیر اعظم عمران خان ملک دے 2 کروڑ محروم اتے غریب ٹبراں کیتے ملک دے سب توں وݙے 120 ارب روپے دے فلاحی پروگرام دا اعلان کر ݙتے جیندے نال 13 کروڑ عوام فیدہ چیسن، پیکج دے تحت ہر ٹبر کوں بازار اچ کھاوݨ پیوݨ دیاں شئیں تے 30 فیصد رعایت ملسی۔ وزیر اعظم عمران خان آکھیے جو پروگرام نال ملک کوں ہک فلاحی اسلامی ریاست ٻݨاوݨ اچ مدد ملسی، وزیراعظم ڄڳ اتے خطے دے ٻئے ملکاں نال پاکستان دے تیل و گیس، بجلی اتے مہانگ دی شرح دا تقابلی جائزہ وی پیش کیتے۔ وزیراعظم آکھیے جو اھساس پروگرام دے تحت ملک اچ ایں ویلھے 260 ارب روپے دے امدادی پروگرام چلدے پین۔ وزیراعظم قوم نال اپݨے خطاب اچ آکھیے جو اڄ میکوں وݙی خوشی اے جو اساں پاکستان دی تاریخ دا سب توں وݙا فلاحی پروگرام پیش کریندے پئے ہیں جیندا مقصد ملک کوں ہک فلاحی ریاست دو ڳھن ونڄݨ اے۔ انہاں احساس پروگرام دی ٹیم کوں مبارک ݙتی جئیں پورے ملک اچ خانداناں دی سماجی معاشی حیثیت پرکھݨ کیتے 3 سال محنت کیتی اے۔ انہاں آکھیے ڄݙاں ساکون حکومت ملی ہئی، ایندے معاشی حالات، مالی خسارہ، ذرمبادلہ دے ذخائر ٻہوں چنتے آلے ہن بھل اڄ شکر اے جو اساں درست معاشی سمت دو ٹر پئے ہیں، ایندے کیتے سعودی عرب، یو اے ای اتے چین دے مشکور ہیں جیں اوکھے ویلھے ہتھ ونݙائے نتاں اساں ݙیوالے تھی ونڄوں ہا۔ انہاں آکھیا حالی اساں ملک کوں تکڑا کرݨ اچ لڳے ہوئے حاسے جو کرونا آڳئے جیندے نال پورا ڄڳ متاثر تھئے بھل کرونا نال نبڑݨ کیتے این سی او سی دی ٹیم صوبیاں اتے ٻئے اداریاں نال رل تے ویلھے سر درست فیصلے کیتن جیندے نال پاکستان اچ صورتحال بہتر تھئے اے، ڄݙاں وݙے وݙے ملک معاشی بدحالی دا شکار تھی ڳین اوں موقع تے آئی ایم ایف، عالمی بنک اتے عالمی جریداں وی پاکستان دی تیکھے اقتصادی کامیابی تے خراج تحسین پیش کیتے جو اساں لوکاں دا روزگار، برآمدات، کاروبار اتے تعمیرات دے شعبہ کوں تکڑا کرݨ تے توجہ ݙتی، ساݙی زراعت وی ترقی کیتی اے، مکئی، گنا اتے کݨک ریکارڈ ودھوتری ݙکھائی اے، کساناں دے حالات چنڳے ہین جیندا ثبوت یوریا دے استعمال، موٹرسائیکل اتے ٹریکٹر دی ریکارڈ وکری اے، ایویں ہی صنعتاں وی کئی عرصے بعد گروتھ ݙکھائی اے، انجنئرنگ دے شعبہ اچ 350 فیصد، ٹیکسٹائل، سیمنٹ، گارمنٹس، تیل و گیس، بجلی دےا ستعمال اچ ودھارا تھئے۔ ٹیکس وصولی 37 فیصد ودھی اے، ٹیکس ہدف اتو تے ویندا پئے، ملک اچ آئی تی برآمدات دا ہدف ایں سال 75 فیصد ودھار ݙکھیسی۔ وزیراعظم منیے جو مہانڳ دا ملک اچ واقعی مسلہ اے بھل میڈیا تنقید اچ توازن رکھے،پیمانہ ݙٹھا ونڄے جو اے مہانڳ حکومت دی وجہ توں ہے یا ایندے تے عالمی مارکیٹ دا کتنا اثر اے؟ ڄڳ دے وݙے اتے ترقی پذیر ملکاں اچ ریکارڈ مہانگ ودھیے۔ گیس، تیل دیاں قیمتان ودھدیاں پین، جیندے نال بجلی وی مہانگی تھئی اے۔ انہاں عشاریاں دا اثر پئے، سمندردی رستے تجارت کیتے 350 فیصد فریٹ ریٹ ودھیے۔ وزیراعظم آکھیے جو ساکوں پٹرول دی قیمتاں مجبورا ودھاوݨیاں پوسن، نتاں تجارتی خسارہ ودھسی اتے بیرونی قرض ولاوݨ کیتے سود لاہوݨ اوکھا تھی ویسی۔ مہانگ تے احتجاج کرݨ آلیاں کوں اپیل کریندے ہوئے انہاں آکھیا اڄ مہنگائی دا رووݨا رووݨ آلے ملک دے ݙو وݙے خاندان جیکر 30 سال ملک دی لٹی ڳئی مݙی دا ادھ پیسہ وی وطن ولا ڳھن آون تاں ملک اچ مہانق ادھا رہ ویسی۔
.jpg)
