اسلام آباد۔11جنوری(اے پی پی) وزیراعظم دے نمائندہ خصوصی بین المذاہب ہم آہنگی و مشرق وسطیٰ امور حافظ محمد طاہر محمود اشرفی آکھیے جنیوا کانفرنس اچ پوری دنیا پاکستان دی قیادت تے اعتماد کیتے، سیلاب متاثرین کیتے وزیراعظم شہباز شریف اتے اتحادی حکومت دیاں کوششاں لائق تحسین ہن، اوکھے ویلھے دوست ملکاں پاکستان کوں کلھا نی چھوڑیا ، ٻدھ کوں اتھاں پریس کانفرنس کریندے ہوئیں پاکستان علماء کونسل دے چیئرمین حافظ محمد طاہر محمود اشرفی آکھیے قوم کوں ݙساوݨ دی لوڑھ اے جو خلافت راشدہ دا نظام کیتا ہئی ، ریاست مدینہ کیا ہئی، عوام کوں ݙساوݨ دی لوڑھ اے خلیفة المسلمین رسول اللہﷺ جنہاں نظام ݙتا ہئی ایں کوں عملی طور تے نافذ کرݨ جیں اچ کوئی وی طاقتور کمزور دے اتے ظلم نی کرسڳدا ، مدینہ دی ریاست دی ڳالھ کرݨ سوکھا اے ، ریاست مدینہ اچ احتساب تھیندے انتقام نی تھیندا ، انصاف دہلیز تے تھیندے ۔ انہاں آکھیے پاکستان علماء کونسل اتے ایندے نال متصل جماعتاں فیصلہ کیتے خطبات جمعہ اچ سیدنا صدیق اکبر دے فضائل اتے خلاف راشدہ دا نظام تے مدینہ دی ریاست کیویں ہوندی اے تے کیا اے بیان کیتے ویسن۔ انہاں آکھیے پاکستان کوں موجودہ حالات اچ وزیراعظم شہباز شریف دی محنت تے کوششاں توں ٻہوں وݙی کامیابی ملی اے ، موجودہ قیادت تے عالمی دنیا دا ھک اعتماد وی اے اتے ایندی تفصیلات وزیراعظم خود بیان کریسن ، پاکستان علماء کونسل اتے ملک دی متصل جماعتاں دی طرفوں وزیراعظم اتے انہاں دی ٹیم دیاں کوششاں کوں تحسین پیش کرینداں ، عرب اسلامی ملک بالخصوص سعودی عرب دا شکریہ ادا کریندوں جیویں انہاں ساݙا ساتھ ݙتا ۔
