اسلام آباد۔17جون (اے پی پی) وزیرِ اعظم شہباز شریف وفاقی وزیرِ صنعت و پیداوار مخدوم مرتضی محمود دی انڈونیشیا توں خوردنی تیل دی درآمد کیتے خصوصی کوششاں دی تعریف کیتی اے ، وزیر اعظم آفس دے میڈیا ونگ توں جاری بیان موجب وزیرِ اعظم شہباز شریف ںال وزیرِ صنعت و پیداوار مخدوم مرتضی محمود تے سیکرٹری امداد اللہ بوسال ملاقات کیتی۔ وزیراعظم آکھیے جو وفاقی وزیر دا خوردنی تیل دی درآمد کیتے ذاتی خرچے تے انڈونیشیا دا دورہ قابلِ ستائش اے، وختی درآمد توں ملک اچ خوردنی تیل دے متوقع بحران دے خطرے دا سد باب تھئے،خوردنی تیل دے کارگو دی آمد توں تیل دے نرخ گھٹ تھیسن ۔وزیراعظم آکھیے ایں سلسلے اچ وفاقی وزیرِ صنعت و پیداوار تے سیکرٹری دیاں کوششاں قابلِ ستائش ہن ۔ واضح رہے جو وزیرِ اعظم دی ہدایت تے وفاقی وزیرِ صنعت و پیداوار مخدوم مرتضی محمود خوردنی تیل دی درآمد کیتے ذاتی خرچے تے انڈونیشیا دا دورہ کیتے ۔دورے دا مقصد ملک اچ خوردنی تیل دی درآمد توں متوقع بحران دا سد باب کرݨا ہئی ۔وزیرِ صنعت دیاں کوششاں توں انڈونیشیا کنوں ڈھائی لکھ میٹرک ٹن (10 بحری جہاز) خوردنی تیل پاکستان کوں ݙتا ویندا پئے ۔ خوردنی تیل دی پہلی کھیپ وزیرِ صنعت و پیداوار دی انڈونیشیا اچ موجودگی دے دوران ہی پاکستان روانہ کرݙتی ڳئی ۔
